හොර වාහන ඉන්ෂුවරන්ස් එකකට අහූඋනාද...

ෆේස් බුක් එකේ කොයි වෙලෙත් ශෙයා වෙන පෝස්ට් ජාතියක් තමා රක්ෂණ ආයතන වලට එරෙහි පෝස්ට් , ඉන්ෂුවරන්ස් කාරයො හොරු, වන්දි ගෙව්වෙ නැතෝ, ඉන්ෂුවරන්ස් නම් ගන්න එපා වගේ ,රක්ෂයේ වටිනාකම හෑල්ලු කරන දේවල්.මම හිතන්නෙ මේකට හේතුව අපේ නොදන්නා කම,හරියට ඉන්ෂුවරන්ස් එකක් ගන්න දන්නවනම් ඒකෙ සහනය කියල නිම කරන්න බෑ.ඒ නිසා වන්දි ගන්න ගියාම ඒ කියන්න ක්ලේම් එකක් ගන්න යද්දි ඒවගේ නහයෙන් අඩන්න වෙන්නෙ නැතිවෙන විදියට ඉන්ෂුවරන්ස් එකක් තමුන්ගේ වාහනේට දාගන්නෙ කොහොමද කියල තේරෙන සිංහලෙන් කියන්නයි යන්නෙ.
ලංකාවෙ නීතියට අනුව වාහනයක් පාරට දානවනම් රක්ෂනයක් අනිවාර්යයෙන් තියෙන්න ඕන. අඩුම ගානෙ තර්ඩ් පාටි ඒ කියන්නෙ තුන්වන පාරශවයේ ආවරණයක් වත්. ඒ ඉන්ෂුවරන්ස් එක වාහනය පාරෙ තියන වෙලාව වෙද්දි ඇක්ටිව් වෙන්නත් ඕන.. ඊයෙ කල් පැනපු ඉන්ෂුවරන්ස් එකකින් අද වාහනේට වෙන සහ වාහනෙන්  වෙනත් අයට වෙන ඩැමේජ්වත් කවර් වෙන්නෙ නෑ.ඒ කියන්නෙ කල්පැනපු රක්ෂනයක් තියන වාහනේකට මොනාහරි උනොත් වන්දි සතපහක් වත් ලැබෙන්නෙ නෑ.අපි අවුරුදු ගානක් රක්ෂනේට ගෙව්ව, ක්ලේම් කරලත් නෑ.. මොනාහරි කරල ගෙවන්න කියල ඒ වෙලාවට නහයෙන් අඬල වැඩක් නෑ.මොකද ඉන්ෂුවරන්ස් එකක් කියන්නෙ නීත්‍යානුකූල ගිවිසුමක් යම්කිසි කාල සීමාවකට ගිවිසගත්ත.. කල් පැන්න කියන්නෙ රක්ෂන ආයත්නයට කරන්න කිසිම දෙයක් නෑ. ගිවිසුම කල් පනින්න දෙන්නෙ නැතුව අලුත් කරගන්න එක අපේ වගකීමක් . එච්චරයි.
ඊලඟට ඔන්ෂුරන්ස් කොම්පැනියක් තෝරා ගන්න එක. ඒක පහසුයි ලංකාවෙ රජයේ අනුමත කොම්පැනි ගානක් තියනව. අනුමත කොම්පැනියක් නම් ඒක ලොකුද පොඩිද අලුත්ද පරනද කියල බයවෙන්න දෙයක් නෑ, මොකද ඒව රජයෙන් නියාමනය වෙනව. ඇත්තම කියනවනම් ඕනෑම ආයත්නෙක මුලික ෆුල් ඉන්ෂුවරන්ස් එකේ වෙනසකුත් නෑ. වෙනස් වෙන්නෙ එක එක කොම්පැනි ඉන්ෂුරන්ස් එකත් එක්ක දෙන අමතර සේවා, ආවරණ ඒ කියන්නෙ ඇඩිශනල් කවර්ස්, ආයතනයේ කීර්තිනාමය වගේ ඒව. කොහොම හරි ආයත්නයක් හරි දෙකක් හරි තමුන් කැමති විදියට තෝරගත්ත කියමුකො, දැන් තියෙන්නෙ ඉන්ෂුවරන්ස් එකට අපිට කීයක් ගෙවන්න වෙනවද, ඒකට හම්බවෙන කවර්ස්, අමතර වාසි, සේවා මොනවද කියල දැනගන්න එක.ඒ කියන්නෙ කොටේශන් එකක් ගන්න එක. මේ වැඩේ කරගන්න දැන් හැම ආයත්නයක්ම වගේ ඔන්ලයින් පහසුකම දීල තියනව, එහෙම නැත්නම් කෙලින්ම ආයතනයේ කාර්‍යාලෙකට යන්න පුලුවන්, එහෙමත් නැත්නම් ආයතනයෙ ඒජන්ට්කෙනෙක්ට හම්බවෙන්න එන්න කියලත් කරගන්න පුලුවන්.
මෙතෙන්දි අපි අපේ වහනය සම්බන්ධ විස්තර ටිකක් දෙන්න වෙනව.හොර බොරු නැතුව හරිම හරි විස්තර මේ වෙලේදි අපි දුන්නෙ නැත්නම් කවද හරි කන්න වෙන පරිප්පුවත් හොඳටම කන්න වෙන්නෙ අපිට ම බව සිහිපත් කරගෙනම මේ විස්තර දෙන්න.
• වාහනයේ අයිතිකරු ඔබද, නැද්ද? යාලුවාගෙ වාහනේ, බෝයි ෆ්‍රන්ඩ්ගෙ ගර්ල් ෆ්‍රන්ඩ්ගෙ , පුංචම්මගෙ පුතාගෙ වාහනේ ඔයාට ඉන්ෂුවරන්ස් කරන්න බෑ.
• අයිති නැත්නම් මොකද්ද වහනෙත් එක්ක තියන නීතිමය බැඳීම. ඇටෝර්නි බලපත්‍රයක් , ලියාපදිංචි ගිවිසුමක් , ලීසිං,ලෝන් ගිවිසුමක් තියනවද
• වාහනය අද විකුනව්වොත් කීයකට දෙන්න පුලුවන්ද. ඒක තමයි ඔන්ෂුරන්ස් කරන්න ඕන වාහනේ වටිනාකම, වාරිකේ අඩුකරගන්න අඩු වටිනාකමක් කියන්න එපා. ක්ලේම් ගන්න වෙන්නෙත් ඒවගේම් අඩුවට තමයි.
• වාහනේ අලාභ හානි නැතිව හොද සහ ලියාපදිංචි පොතේ සදහන් තත්වයේ තියනවද? ඒ කියන්නෙ ඇන්ජින් මාරුකරල, චැසි මාරුකරල, වාහනේ හදපු එවුන් හීනෙකින්වත් හිතපු නැති මොඩිෆිකේශන් කරල තියනවද කියල.
• පුද්ගලික පාවිච්චියද, හයර් දුවනවද? ඉදල හිටලහරි ඔය එන හයර් එකක් එහෙම ගන්නවනන් ඒක හයර් කරන වාහනයක් තමයි .
• ඕනෙ කරන අමතර කවර්ස් මොනවාද? කලින් ඉන්ෂුවරන්ස් වල නෝ ක්ලේම් බෝනස් එහෙම තිබ්බද.? නෝ ක්ලේම් බෝන්ස් කියන්නෙ අනතුරු නැතුව වාහනය පැදවීම වෙනුවෙන් රක්ෂණ ආයතන දෙන ඩිස්කවුන්ට් එකක්.
• තව වාහනේ ගැන හෙලිකරන්න මොනාහරි විශේෂ දේවල් තියනවද?.. ඒ කියන්නෙ මේ වාහනේට අමතර ගැජට්, මිල අදික වෙනස් කිරීම් වගේ දේවල් කරල තියනවද, කලින් අනතුරු එහෙම වෙලා රෙපෙයාර් කරල තියනවද වගේ දේවල්

මේ දේවල් අවංකව ඉන්ෂුවරන්ස් කොම්පැනියට කොටේශන් එක ගන්න වෙලාවෙදි කියන්න බැරිනම්, කරැනාකරල ෆුල් ඉන්ෂුවරන්ස් එකක් ගන්න එපා.දෙයියනේ කියල තර්ඩ් පාටියක් දාගෙන වාහනේ පදින්න.
ඔන්න දැන් මේ කරුණු ටික දුන්නාම ආයතනය කොටේශන් එකක් දෙනව. කට වචනෙට ගන්න එපා මේක ප්‍රින්ටඩ් කොපියක් හරි ඊ මේල් එකකකින් හරි ගන්න.මේක හොඳට කියවල බලන්න මොනාද හම්බවෙන කවර්ස්, මොනාද හම්බවෙන්නෙ නැත්තෙ, අමතරව සේවා මොනාද කියල. ඕනෑම රක්ෂණ ආයත්නෙකින් සිංහල ,දමිළ භාශාවෙන් කොටේශන් එකක් ලබගන්න පහසුකම තියනව. ඕක තේරෙන්නෙ නැත්නම් හොඳම දේ ආයතනෙට ගිහින් හරි ඒජන්ට් කෙනෙක්ට එන්න කියල හරි හරියටම අහගන්න එක. සමහරු ආපෝ ඒ ඔෆිසර් පොඩි කොල්ලෙක් , කෙල්ලෙක්, ඒ ඒජන්ට් මම තරම් ඉගනගෙන නෑ වගෙ දේවල් කියල තමුන් දන්නැතිදේ අහගන්නෙ නැතුව ලොකු කමට ඉන්නව,ඒ වගේ පණ්ඩිතයො තමයි.තමන්ගෙ රක්ෂණ ,බැංකු,නීති වගේ හැම වැදගත් සේවාවක්ම අනාගන්නෙ.කරුනාකරල ඒවගේ වෙන්න එපා. වයසින් අඩු වැඩි උනත් ගැහැනු හො පිරිමි උනත් නිතරම වුර්තිකයන්ට ඇහුම්කන් දෙන්න.
හරි කොටේශන් එක පැහැදිලි කරගත්ත නම් ඒක තමා ඉන්ෂුවරන්ස් කොම්පැනියෙන් තමුන්ට ලැබෙන දේ. ඊට අමතරව කටවචනෙට ,ඇඩ්වර්ටිස්මන්ට් වල මොනා කොහොම කිව්වත් කොටේශන් එකට අමතරව බඹර තුඩක් දෙයක් බලාපොරොත්තු වෙන්න එපා.
කොටේශන් ගත්තට පස්සෙ තමුන්ට ගැලපෙන ආයතනයක් තීරනය කරපුවාම වැඩෙන්බාගයක් ඉවරයි, ඒත් තව වැදගත් දේවල් කීපයක් තියනව කරන්න.
එකක් තමයි වාහනේ ඉන්ෂුවරන්ස් කොම්පැනියට පෙන්නන එක. වෙහිකල් ඉන්ස්පෙක්ශන්. එදාට ආයතනෙ නිලධාරියෙක් වාහනේ බලල ,ෆොටෝ එහෙම අරගෙන රිපෝට් එකක් හදනව.මේක ඉතාම වැදගත් මේ රිපෝට් එක තමයි ඇක්සිඩන්ට් ක්ලේම් එකකදි වාහනය පෙර තිබ්බ තත්වෙ බලන්න යොදාගන්නෙ, මේ ඉන්ස්පෙක්ශන් එකේදී වාහනේ තියන පොඩි පොඩි අඩුපාඩුත් එර් නිලධාරිය පෙන්නල දෙයි. ඒව හදල නැවත් පෙන්වීම් අපේ යුතුකමක්.
ඉන්ස්පෙක්ශන් එකෙන් පස්සෙ ඉන්ෂුවරන්ස් ප්‍රොපොසල් ෆෝර්ම් එක ,ඒ කියන්නෙ යෝජනා පත්‍රය පුරවල දෙන්න ඕනෙ. සමහරු නිකන් මේක අත්සන් කරල ඔය මහත්වරු ඕක පුරව ගන්න කියනව ,කරුනාකරල ඒ මෝඩවැඩේ කරන්න එපා.තමන් ම පුරවන්න නිවැරදි ම තොරතුරු ලබාදෙන්න, ප්‍රොපොසල් එකේ වැරදි තොරතුරු එකක් හරි තිබ්බ කියල පස්සෙ හෙලි උනොත් , ක්ලේමුත් නෑ ගෙවපු මුදලුත් නෑ, නීතිය ඉස්සරහත් වැරදිකාරයෙක් වෙනව කියල මතකතියා ගන්න.වෙන කෙනෙක් තමන් වෙනුවෙන් ප්‍රොපොසල් එක පුරවනවනම් ඒක බාරදෙන්න කලින් හොඳට කියවල,තහවුරු කරනව කියල ලියල අත්සන් කරල බාරදෙන්න. ප්‍රොපොසල් එකත් එක්කම වාහනේ ලියාපදිංචි පොත,වෙනත් ගිවිසුම්, ලියකියවිලි වගේ ආයතනය ඉල්ලන අනෙක් ලියකියවිලිත් බාරදෙන්න.
මේ සියලුම දෙවල් ඉන්ෂුවරන්ස් සමාගමට ලැබුනට පස්සෙ සමාගම වාහනේට ඉන්ෂුවරන්ස් පොලිසියක් ඒ කියන්නෙ රක්ෂණ ඔප්පුවක් නිකුත්කරනව. ඒ මොහොතෙ ඉදල ඔබේ වාහනේට ගිවිසගත්ත විදියට ආවරනය ලැබෙනව.
රක්ෂණ ඔප්පුවක් නිකුත්කරනවත් එක්කම තව ලිය කියවිලි කීපයක් සමාගම නිකුත් කරනව.
• වාහනයේ තියාගන්න ඉන්ෂුවරන්ස් කාඩ් එකක්, මේකෙ ලබාගෙන තියන ඉන්ෂුවරන්ස් එකෙ මූලික විස්තර සදහන් වෙනව.වාහන අංකය, කාල සීමාව වගෙ.
• සියලු කරුනු අඩංගු රක්ෂණ ඔප්පුව.
• මුදල් ගෙව්වානම් ඒ බවට රිසිට් එක
• මුදල් චෙක් වලින් පස්සෙ ගෙවනවානම් ඒබව සදහන් ණයපත ඒ කියන්නෙ ඩෙබිට් නෝට් එක
මේව හම්බ උන ගමන්ම කරන්න ඕනෙ සියලු විස්තර හරිද, කොටේශන් එකේ තිබ්බ දේවල් ඔප්පුවෙත් තියනවද කියල බලන එක. මේ ඔප්පුවත් සිංහල ,දමිළ ,ඉංගිරිසි භාශා තුනෙන්ම ගන්න පුලුවන්.ඕකෙ මොනාහරි වැරැද්දක් ,අපැහැදිලි දෙයක් තියනවනම් ඒ වෙලාවෙදිම නිවැරදි කරගන්න.රක්ෂණය ගැන ඒත් අපැහැදිලි කමක් තියනවනම් හරි කොටේශන් එකට අනුව නෑ කියල තේරෙනවනම් හරි කරුනාකරල ඉන්ෂුවරන්ස් පොලිසි එක කැන්සල් කරන්න. පොලිසි එක අරන් මාස දෙක තුනක් ගියාට පස්සෙ සත්‍යාවබෝධ වෙලා කැන්සල් කරන්න ඕනෙ කියල දඟලනවට වැඩිය ඒක හොඳයි.
ඉන්ෂුවරන්ස් එක ගෙව්වෙ මුදලින් නම් ඉතා හොඳයි. චෙක් දුන්නනම් ඒව ඇදල ,රිටන් කරල වගේ කුණු වැඩ කරන්නෙ නැතුව, මහත්වරුවගේ නියම වෙලාවට ගෙවන්න, මොකද ඉන්ෂුවරන්ස් කොම්පැනියක් ඔබට ගෙවන ක්ලේම් චෙක් කවදාවත් ඉස්සරහට දින දාල දෙන්නෙවත්, ඒ චෙක් රිටර්න් වෙන්නෙ වත් නෑ.දැන් මේ ටික ඔක්කොම හරියට උනානම් ඔයත් වාහනේට හරි ඉන්ෂුවරන්ස් එකක් දාගත්ත, ආඩම්බරකාර වාහන හිමියෙක්. තමුන්ගේ සහ අනුන්ගේ ජීවිතයට සහ දේපල ගැන සැලකිලිමත් වෙනව කියන්නෙ නීතියෙන් ගැලවෙන්න මොකක් හරි ඉන්ෂුවරන්ස් කොලයක් එල්ලගෙන දුවනවවගේ නෙවේ ඒක ඔලුව කෙලින් තියන් පාරට වාහනේ දාන්න පුලුවන් දෙයක්.ඔබට සුබ ගමන්...

තුෂාර ආසිරි